7th Birthday ng anak ng Mayor namin noon. At dahil anak ng politicians, aba, bigtime ang party! Mala-debut ang dating, nagpagawa pa ng bagong venue at may cotillon de honor. O-ha!
Bangs pa more! Tease pa more!
Bilang politicians din si Mother Earth, isa ako sa napabilang sa cotillon. Seryosohan ang practice. Tandang tanda ko pa ang dance instructor namin na ubod nang tabil ang bunganga…
“Wag ilalagay ang kamay sa harapan. Mukha kayong nagkakamot ng kepyas!”
7-10 years old lang kami noon ha. Lord, patawarin niyo po siya.
First day ng practice, pinagpares-pares na kami. At naku, sa pinaka-cute na little boy ako pinartner! Itago natin siya sa pangalang Juan. #KiligPaMore Kaya naman excited na excited ako tuwing mag-eensayo. Sinisigurado kong terno ang blouse ko sa shorts. Hello Kitty kung Hello Kitty. Floral kung floral.
Ilang araw na lang bago ang party, may isang batang lalaki na nadagdag – si Pedro. Cute din naman at matangkad si Pedro pero mas bet ko pa rin si Juan. Kaso, dahil sa pagbabagong ito, nagbago rin ang pairing. At dahil ako ang pinakamatangkad na babae…
D.I.: Juan, kay Maria ka na papartner. Ikaw, Camille, si Pedro na partner mo. Ituro mo sa kanya ang steps.
Nagsalubong ang kilay ko sabay haba ng nguso. At di na nabago ang facial expression na ‘yun hanggang umuwi kami. Actually, hanggang umabot sa araw ng party. Pikon na pikon pa rin ako sa D.I.! Sagabal sa kaligayahan!
Oo, ako ‘yang nakapameywang. #YamotNaYamot
At dumating na nga ang araw ng party. Yung topak ko, hindi pa humuhupa.
Aling Curing: Camille, ligo na at aayusan pa kayo bago mag-party. Tapos magbibihis pa.
Camille: Ayoko na sumali.
Aling Curing: Anong ayaw mo?!? Hindi pwede, ligo na.
Hinubaran na ko ni Aling Curing at binuhusan ng tubig sa banyo. Sa puntong ito, wagas na ang pagmamaktol at iyak ko. AYOKO NA NGA SUMALI!!!
Aling Curing: Bakit ba?? Sabihin mo sakin.
Camille: Basta! Ayoko na!
At sa gitna ng pagda-drama ko, biglang bumukas ang shower curtain at dumagundong ang banyo …
Kuyakoy: MALIGO KA NA!!! ANO BA KASI PROBLEMA MO???!
Nanlamig ako sa takot. Hanggang tuhod lang ata ako ni Kuyakoy. Highschool na siya, Grade 1 lang ako. Baka tapakan niya ko. Pero nag-aalab ang damdamin ko. Ayoko sana sabihin ang totoo pero hindi ko napigilan…
Camille: HINDI KO KASI PARTNER ANG CRUSH KO!!!
Natigilan ang lahat at sabay sabay…
BWAHAHAHAHAHAHAHAHAHA!!!
Pinagtawanan nila ang feelings ko. Masakit. Pero mas ok na rin yun. Kesa ibitin nila ko nang patiwarik sa kalandian ko. ;P
Leave a Reply